اسان مضبوط ارادي ۽ گڏيل بصيرت سان بلوچستان ۾ دهشتگردي جو مڪمل خاتمو ڪنداسين ۽ دهشتگردن کي ڪيفر ڪردار تائين پهچائينداسين: وزيراعظم محمد شهباز شريف

ڪوئيٽا – 29 – آگسٽ (اي پي پي) وزيراعظم محمد شهباز شريف چيو آهي ته اسان مضبوط ارادي ۽ گڏيل بصيرت سان بلوچستان ۾ دهشتگردي جو مڪمل خاتمو ڪنداسين ۽ دهشتگردن کي ڪيفر ڪردار تائين پهچائينداسين، بلوچستان ۾ پيش ايندڙ تازي دل ڏکوئيندڙ واقعي تي پوري پاڪستاني قوم ڏکويل آهي، دهشتگردي جي ڪڌي منصوبي تحت بيگناهه پاڪستانين جو رت وهائيندڙ خارجي دهشتگردن کي چيڀاٽيو ويندو. اهڙن خيالن جو اظهار هن ڪوئيٽا ۾ نيشنل ايڪشن پلان جي صوبائي ايپڪس ڪميٽي جي اجلاس کي خطاب ڪندي ڪيو. ان موقعي تي چيف آف آرمي اسٽاف جنرل عاصم منير، نائب وزيراعظم ۽ پرڏيهي وزير اسحاق ڊار، بلوچستان جو گورنر شيخ جعفر خان مندوخيل، بلوچستان جو وڏو وزير مير سرفراز بگٽي، وفاقي گهرو وزير محسن نقوي، منصوبابندي وارو وفاقي وزير احسن اقبال، اطلاعات ۽ نشريات وارو وفاقي وزير عطاءُ الله تارڙ، واپار وارو وفاقي وزير ڄام ڪمال خان، ڪور ڪمانڊر بلوچستان راحت نسيم احمد، چيف سيڪريٽري شڪيل قادر ۽ ٻيا پڻ موجود هئا. وزيراعظم محمد شهباز شريف چيو ته 26 آگسٽ تي بلوچستان ۾ دهشتگردي جو جيڪو واقعو پيش آيو اهو انتهائي دل ڏکوئيندڙ آهي، ان واقعي سان پوري پاڪستان جي عوام ۾ ڳڻتي جي لهر آهي، ان افسوسناڪ واقعي تي پوري پاڪستاني قوم ڏکويل آهي پر اسان واضح ڪريون ٿا ته اسان گڏيل بصيرت ۽ مضبوط ارادي سان بلوچستان ۾ دهشتگردي جو مڪمل خاتمو ڪنداسين، بلوچستان پاڪستان جو هڪ اهم ۽ خوبصورت صوبو آهي جنهن جي ترقي ۽ خوشحالي جي رستي ۾ سموريون رڪاوٽون ختم ڪيون وينديون. وزيراعظم چيو ته پاڪستان ۾ خارجي عنصرن دهشتگردي جو منصوبو ٺاهيو ۽ بيگناهه پاڪستانين جو رت وهايو جنهن ۾ قانون لاڳو ڪندڙ ادارن، ايف سي، ليويز اهلڪارن سميت عام شهري شامل آهن پر شهيدن جو رت رائيگان وڃڻ نه ڏنو ويندو. وزيراعظم چيو ته ان ۾ ڪو شڪ نه آهي ته الله تعاليٰ جي فضل ۽ ڪرم سان پاڪ فوج، چيف آف آرمي اسٽاف جنرل عاصم منير ۽ بلوچستان جي وڏي وزير جي قيادت ۾ وفاقي حڪومت جي مڪمل تعاون سان دهشتگردي کي پاڙ کان پٽي اڇلائيندي، دهشتگردي پوري پاڪستان ۾ 2018ع کانپوءِ جيڪو ٻيهر ڪَر کنيو آهي ان کي چيڀاٽيو ويندو، پاڪستان جي ترقي ۽ خوشحالي جي لاءِ سڀني کي گڏجي اڳتي وڌڻو پوندو. وزيراعظم چيو ته قائداعظم محمد علي جناح، علامه محمد اقبال جي راهه تي هلندي ملڪ جي استحڪام جي لاءِ پنهنجي جانين جا نذرانا پيش ڪندڙن جون قربانيون رائيگان وڃڻ نه ڏينداسين، وزيراعظم ان عزم جو اظهار ڪيو ته مضبوط ارادي سان گڏيل ڪوششن سان دهشتگردي جو خاتمو ڪنداسين.

مضمون کا ماخذ : prêmios dupla sena

متعلقہ مضامین