پاڪستان جي ترقي جي ڪُنجي نوجوان نسل جي هٿ ۾ آهي: وزيراعظم محمد شهباز شريف

اسلام آباد – 21 آگسٽ (اي پي پي) وزيراعظم محمد شهباز شريف چيو آهي ته پاڪستان جي ترقي جي ڪُنجي نوجوان نسل جي هٿ ۾ آهي، نوجوانن کي ترقي جي لاءِ سمورا وسيلا مهيا ڪنداسين، جديد علم ۽ ٽيڪنالاجي سان ئي نوجوان ترقي ۽ خوشحالي جي منزل ماڻي سگهندا، بجلي، اوڳاڙين ۽ روانگي واپار سميت ٻين چئلينجز کي منهن ڏيڻ جي لاءِ ڪوششون ڪري رهيا آهيون، پاڪستان مسلمان دنيا جي پهرين ائٽمي قوت آهي، اڄ ڪو به دشمن پاڪستان طرف ميري اک سان ڏسي نه ٿو سگهي، وقت جي گهرج آهي ته ملڪي ترقي جي لاءِ سڀ پنهنجو ڪردار ادا ڪن، اسان کي هر صورت ۾ دهشتگردي جو خاتمو ڪرڻو آهي، پاڪستان جو آئين قومي وحدت جي علامت آهي. قومي يوٿ ڪنوينشن کي خطاب ڪندي وزيراعظم ڪنوينشن جي شرڪت ڪندڙن جي آجيان ڪئي ۽ چيو ته ڪجهه ڏينهن اڳ آزادي جو ڏهاڙو انتهائي جوش ۽ جذبي سان ملهايو ويو ۽ انهن خوشين ۾ 40 سالن کانپوءِ پاڪستان گولڊ ميڊل حاصل ڪري انهن خوشين کي ٻيڻو ڪري ڇڏيو، ارشد نديم همت نه هاري، هن مشڪل حالتن جو مقابلو ڪيو، جستجو ۽ لگن سان ارشد نديم ڏينهن رات محنت ڪئي ۽ پاڪستان کي گولڊ ميڊل کٽرائي اهو ثابت ڪيو ته حالتون ڪيتريون به مشڪل ۽ چئلينجز درپيش هجن جيڪڏهن قومون اهو فيصلو ڪري وٺن ته اسان کي مشڪلاتن جو مقابلو ڪرڻو آهي ۽ اسان کي هار ناهي مڃڻي ته يقين ڪريو جهڙي طرح قائداعظم جي ولولي انگيز قيادت ۾ پاڪستان وڏين قربانين کانپوءِ وجود ۾ آيو، نه رڳو ماضي جون ڪوتاهيون ختم ٿي وينديون پر پاڪستان عالمي دنيا ۾ پنهنجو وڃايل مقام حاصل ڪري وٺندو. وزيراعظم چيو ته پاڪستان جي ترقي جي ڪُنجي نوجوان نسل جي هٿ ۾ آهي، نوجوانن کي سڀاڻي جي پاڪستان کي روشن بڻائڻو آهي، حڪومت وقت جو اهو فرض آهي ته اها نوجوانن کي جديد علم سان ليس ڪري، انهن کي جديد ٽيڪنالاجي ڏي ته جيئن پاڪستان جي اندر ترقي ۽ خوشحالي جو انقلاب اچي سگهي. وزيراعظم چيو ته عالمي اسڪالرشپس حاصل ڪرڻ ۾ گذريل ٽن سالن ۾ پاڪستان ٽاپ تي رهيو آهي جيڪو ان ڳالهه جو ثبوت آهي ته اسان جي نوجوان نسل کي جيڪڏهن موقعا ڏنا وڃڻ ته پاڪستان طرف ڪير به معاشي ۽ دفاعي لحاظ کان ميري اک سان نه ڏسي سگهندو. هن چيو ته اسان کي ٻڌي، اتفاق ۽ اتحاد سان اڳتي وڌڻو پوندو، 77 سالن جي سفر ۾ يقينن عظيم ڪاميابيون به حاصل ڪيون ۽ ناڪاميون به ٿيون، جيڪڏهن اسان سچي دل سان ان جو تجزيو نه ڪنداسين ته اسان صحيح نتيجي تي نٿا پهچي سگهون. هن چيو ته 1973ع جي آئين پاڪستان کي معاشرتي ۽ سياسي لحاظ سان ڳنڍي رکيو آهي، اهو آئين سياسي اڳواڻن متفقطه طور تي ٺاهيو جيڪو قومي وحدت جو هڪ نشان آهي، اهڙي طرح پاڪستان سمورين مشڪلاتن جي باوجود هڪ ائٽمي طاقت بڻيو، دنيا جي پابندين جي باوجود اٽل فيصلي ۽ عزم سان پاڪستان اسلامي دنيا جي واحد ائٽمي قوت آهي، قيامت تائين دشمن پاڪستان طرف ميري اک سان نه ڏي سگهندو. هن چيو ته پاڪستان مان دهشتگردي جي خاتمي جي لاءِ 70 هزار جانيون نڇاور ڪيون ويون، زندگي جي هر شعبي سان تعلق رکندڙ ماڻهو ان ۾ پنهنجو حصو وڌو، پاڪ فوج، پوليس سميت چئني صوبن جي ماڻهن قربانيون ڏنيون، تڏهن وڃي ان ناسور کي دفن ڪيو ويو. وزيراعظم چيو ته بدقسمتي سان گذريل ڪجهه سالن جي غلطين جي ڪري دهشتگردي ٻيهر ڪَر کنيو آهي، دهشتگردي سان پاڪستان جي معيشت کي ڏيڍ سئو ارب ڊالر جو نقصان پهتو جڏهن ته ان جي مقابلي ۾ اسان کي 20 ارب ڊالر فراهم ڪيا ويا، پاڪستان جي دهشتگردي جي خلاف جنگ جو فائدو پوري دنيا کي پهتو، پاڙيسري ملڪ مان ٿيندڙ دهشتگردي جو خاتمو ٿيو، ان جي لاءِ پاڪستاني قوم عظيم قربانيون ڏنيون آهن، دفاعي ادارن ان ڏس ۾ ڀرپور ڪردار ادا ڪيو آهي، قوم انهن کي سدائين ياد رکندي. وزيراعظم چيو ته پاڪستان هڪ زماني ۾ تيزي سان ترقي جي رستي تي گامزن هو، پي آءِ اي جي ماهرن ڪيترن ئي ڀائر ملڪن کي ايئرلائينز ٺاهي ڏنيون پر بدقسمتي سان اسان کي اڄ ان اداري جي نجڪاري ڪرڻي پئجي رهي آهي، پاڪستان جي 5 سالا ترقياتي منصوبي جي ڪاپي ڪئي وئي ۽ ڏکڻ ڪوريا پاڪستان جي رستي تي هليو ۽ اڄ بدقسمتي سان ڏکڻ ڪوريا ۽ پاڪستان جي ترقي جي ڀيٽ ڪريو ته اهي اسان کان اڳتي نڪري چڪا آهن، اسان کي بنا دير اهو فيصلو ڪرڻو پوندو ته هي سلسلو ائين ئي هلندو رهندو يا اسان کي اڳتي وڌڻو آهي، پاڪستان ۾ موجود ڪروڙين نوجوانن کي پاڪستان جي تقدير بدلائڻي آهي. وزيراعظم چيو ته اسان کي نوجوانن کي سمورا وسيلا مهيا ڪرڻا آهن ته جيئن معيشت بهتر ٿي سگهي، بطور وڏي وزير نوجوان نسل کي لکين ليپ ٽاپس ميرٽ تي ڏنا، پنجاب ايجوڪيشن انڊومنٽ فنڊ سان 22 ارب رپين جا وظيفا شاگردن کي ڏنا، اهي هوشيار نوجوان اڄ پنهنجي شعبن ۾ نمايان خدمتون سرانجام ڏئي رهيا آهن، پنجاب انڊومنٽ فنڊ هاڻي پاڪستان ايجوڪيشن انڊومنٽ فنڊ بڻجي چڪو آهي. وزيراعظم چيو ته اسان نوجوان نسل جي تعمير ڪنداسين، سمال ميڊيم انٽرپرائيزز ۾ نوجوانن کي اڳتي آڻينداسين، اسٽيٽ بئنڪ سان ان حوالي سان ڳالهه ٻولهه ٿي آهي، اها نوجوانن کي 40 سيڪڙو قرض فراهم ڪندي. هن چيو ته اوڀر پاڪستان ۾ پاڪستان مخالف تحريڪ هلائيندڙ ۽ نظريه پاڪستان کي دفن ڪرڻ جي ڳالهه ڪندڙ جي مجسمي تائين ٽوڙيو ويو، ان مان سبق حاصل ڪرڻ جي ضرورت آهي. هن چيو ته اسان مشڪلاتن کي منهن ڏينداسين ۽ انهن جو حل ڪڍنداسين. هن چيو ته بجلي عام ماڻهو جي لاءِ هڪ وڏو چئلينج آهي، اسان ترقياتي بجيٽ مان 50 ارب رپيا ڪڍي 86 سيڪڙو گهريلو صارفين کي ريليف ڏنو، پنجاب حڪومت پنهنجي وسيلن مان 45 ارب رپين جي سبسڊي جو اعلان ڪيو آهي، ان سان گهريلو صارفين کي وڏو ريليف ملندو، ان تي ڪا سياست نه ٿيڻ گهرجي پر ٻيا صوبا به ان ۾ حصو وجهن، اڄ پاڪستان کي ورڇ نه پر اتفاق ۽ اتحاد جي ضرورت آهي، اسان جيڪڏهن نيڪ نيتي سان پاڪستان جي حالت بدلائڻ جو عزم ڪريون ته پاڪستان عالمي دنيا ۾ عزت ۽ وقار سان ڪنڌ کڻي هلي سگهي ٿو، اڄ جي معروضي حالتن جي گهرج آهي ته سياستدان گڏجي هن ملڪ جي خدمت ڪن ۽ آئيني ادارن سان گڏ انهن جي دائري ۾ رهندي گڏجي ڪم ڪنداسين ته تاريخ سدائين اسان کي ياد رکندي نه ته ايندڙ نسل اسان کي معاف نه ڪندي، اسان پاڪستان جي هٿياربند فوج جي سپهه سالار سان گڏجي هڪ جان ٻه دل ٿي پاڪستان جي ترقي جي لاءِ ڪم ڪري رهيا آهيون.

مضمون کا ماخذ : لاٹری کا حساب

متعلقہ مضامین