وزيراعظم شهباز شريف جو تاجڪستان ۽ قازقستان جو دورو انتهائي ڪامياب رهيو، وزيراعظم جي دوري دوران واپار ۽ سيڙپڪاري ۾ اضافي جا معاملا اڳتي وڌيا آهن: عطاءُ الله تارڙ

اسلام آباد – 05 – جولائي (اي پي پي) اطلاعات، نشريات، قومي ورثي ۽ ثقافت واري وفاقي وزير عطاءُ الله تارڙ چيو آهي ته وزيراعظم شهباز شريف جو تاجڪستان ۽ قازقستان جو دورو انتهائي ڪامياب رهيو، وزيراعظم جي دوري دوران واپار ۽ سيڙپڪاري ۾ اضافي جا معاملا اڳتي وڌيا آهن، وزيراعظم شنگهائي تعاون تنظيم جي سربراهي اجلاس ۾ فلسطين تي پاڪستان جو واضح موقف پيش ڪري پاڪستان جي عوام جي دل جي آواز جي ترجماني ڪئي آهي، ايف بي آر جي ڊيجيٽلائيزيشن جو عمل تيزي سان جاري آهي، حڪومتي قدمن جي ڪري گذريل ڪجهه ڏينهن دوران ٽي لک کان وڌيڪ نئين ٽيڪس ڏيندڙن پنهنجا گوشوارا جمع ڪرايا، گ ذريل ٻن هفتن دوران جعلي سيلز ٽيڪس ريفنڊ ڪندڙ چار هزار ماڻهن ۽ ڪمپنين جي نشاندهي ٿي، انڊر انوائسنگ تمام وڏو ڏوهه آهي، وزيراعظم جي هدايت آهي ته انڊر انوائسنگ ڪندڙ ڪمپنين جا ريفنڊ روڪيا وڃن، عزم استحڪام پوري ملڪ جو معاملو آهي، عزم استحڪام بابت ڪل جماعتي ڪانفرنس گهرائڻ تي اتحادين سان مشاورت جاري آهي. پي ٽي وي هيڊڪوارٽرز ۾ پريس ڪانفرنس کي خطاب ڪندي اطلاعات واري وفاقي وزير چيو ته وزيراعظم جي تاجڪستان ۽ قازقستان جي دورن جا سٺا نتيجا سامهون ايندا، وزيراعظم تاجڪستان کان پنهنجي دوري جي شروعات ڪئي، تاجڪستان ۾ پاڪستاني وفد کي تمام گهڻي پذيرائي ملي، تاجڪستان جي صدر پاڪستان جي لاءِ جن جذبن جو اظهار ڪيو ان تي ان جا ٿورائتا آهيون. هن چيو ته وزيراعظم جي دوري دوران ڪراچي پورٽ سميت لينڊ روٽس ۽ ريل روٽس جي حوالي سان پڻ تفصيلي ڳالهه ٻولهه ٿي. ٻنهي ملڪن جي وچ ۾ واپار ۾ اضافي ۽ ڪاروباري طبقي کي سهولتن جي فراهمي تي پڻ ڳالهه ٻولهه ٿي. هن چيو ته تاجڪستان ۽ پاڪستان جي عوام واپار ۽ سيڙپڪاري مان فائدو کڻي سگهي ٿي. اطلاعات واري وفاقي وزير چيو ته قازقستان جي دوري دوران وزيراعظم جي شنگهائي تعاون تنظيم جي سربراهي اجلاس جي موقعي تي روس جي صدر ولادي مير پيوٽن سان سائيڊ لائين ملاقات ٿي جنهن ۾ ٻنهي ملڪن جي وچ ۾ واپار کي وڌائڻ جي ضرورت تي زور ڏنو ويو ۽ زراعت، مائننگ، پيٽرو ڪيميڪلز سميت ڪيترن ئي اهم شعبن ۾ تعاون ۽ حصيداري کي وڌيڪ وڌائڻ تي اتفاق ڪيو ويو. هن چيو ته ايندڙ ڏينهن ۾ روس ۽ پاڪستان جي وچ ۾ واپار ۾ اضافو ٿيندو. اطلاعات واري وفاقي وزير چيو ته وزيراعظم جي دوري دوران ترڪيه، پاڪستان ۽ آذربائيجان جي وچ ۾ ٽه ڌريي ڳالهه ٻولهه پڻ ٿي جنهن ۾ علائقائي امن ۽ استحڪام تي ڳالهه ٻولهه ٿي. هن چيو ته وزيراعظم ڀرپور طريقي سان پاڪستان جي نمائندگي ڪئي. هن چيو ته وزيراعظم شهباز شريف جي بيلاروس ۽ ازبڪستان جي صدرن سان ملاقاتن ۾ پڻ واپار ۾ اضافي ۽ ڪاروباري طبقن کي سهولتن جي فراهمي جي حوالي سان ڳالهه ٻولهه ٿي. هن چيو ته پاڪستان جي معيشت جي استحڪام ۾ اهي سموريون ملاقاتون اهم ڪردار ادا ڪنديون. هن چيو ته وزيراعظم جي دوري جا ڏورس اثر پوندا، ان دوران جيڪي ملاقاتون ۽ ڳالهيون ٿيون، ان جي نتيجي ۾ ڪيترائي وفد پاڪستان ايندا. هن چيو ته تاجڪستان ۾ اسٽريٽجڪ پارٽنرشپ جي معاهدن ۽ ايم او يوز تي پڻ صحيحون ٿيون. هن چيو ته واپاري ڪاٿي ۽ سيڙپڪاري وڌائڻ جي حوالي سان معاملا اڳتي وڌيا آهن. وزيراعظم جي ڊپلوميسي سان تمام گهڻو فائدو ٿيو آهي. هن چيو ته شنگهائي تعاون تنظيم جي سربراهي اجلاس ۾ وزيراعظم شهباز شريف فلسطين جي حوالي سان پاڪستان جو واضح موقف پيش ڪيو، ان کان اڳ ڪڏهن به فلسطين جي مسئلي تي ايترو واضح موقف پيش نه ڪيو ويو. هن چيو ته وزيراعظم اسرائيل پاران معصوم ۽ مظلوم فلسطينين جي نسل ڪشيءَ جو ذڪر ڪيو ۽ چيو ته اسرائيلي جنگي ڏوهن جو مرتڪب ٿي رهيو آهي. وزيراعظم فلسطين ۾ 37 هزار فلسطينين جي شهادت جو پڻ ذڪر ڪيو. 20 لک ماڻهو لڏپلاڻ تي مجبور آهن. هن چيو ته غزه ۽ رفح ۾ اسپتالن تي بمباري ڪئي پئي وڃي. وزيراعظم واضح طور تي چيو ته اسرائيل کي جوابده بڻايو وڃي. پاڪستان 1967ع کان اڳ جي سرحدن موجب آزاد فلسطيني رياست کي تسليم ڪري ٿو جنهن جي گادي وارو شهر القدس هجي. هن چيو ته فلسطينين، غزه ۽ رفح جي رهواسين جي حق ۾ وزيراعظم هر پاڪستاني جي دل جي ترجماني ڪئي آهي. وفاقي وزير چيو ته شنگهائي تعاون تنظيم جي سربراهي اجلاس ۾ اسلامو فوبيا ۽ افغانستان جي حوالي سان پڻ ڳالهه ٻولهه ٿي. هن چيو ته هڪ پرامن ۽ مستحڪم افغانستان نه رڳو پاڪستان پر پوري خطي جي حق ۾ آهي. ايف بي آر جي ڊيجيٽلائيزيشن بابت ڳالهائيندي اطلاعات واري وفاقي وزير چيو ته ايف بي آر جي ڊيجيٽلائيزيشن شروع ٿي وئي آهي، وزيراعظم جي حڪمت عملي سان ايف بي آر جي ڊيجيٽلائيزيشن تي پاڪستان حڪومت جو هڪ رپيو خرچ نه ٿيو، مڪينزي ڪارپوريشن دنيا جي ناليواري ڪنسلٽينسي فرم آهي جنهن کي ملينڊا گيٽس فائونڊيشن جي ذريعي شارٽ لسٽ ڪيو ويو آهي، ملينڊا گيٽس فائونڊيشن ان جا خرچ برداشت ڪيا آهن. هن چيو ته اڄ وزيراعظم کي ٻڌايو ويو ته ايف بي آر جي ڊيجيٽلائيزيشن جي دوران 45 لک اهڙن ماڻهن جي نشاندهي ڪئي وئي آهي جيڪي ٽيڪس ڏيڻ جي طاقت رکن ٿا پر ٽيڪس ادا نه ٿا ڪن. اهڙن نان فائيلرز جيڪي ٽيڪس ڏيڻ جي اهل آهن ۽ گوشوارا جمع نه ٿا ڪرائين انهن کي فوري طور تي ٽيڪس نيٽ ۾ آندو وڃي. هن چيو ته نان فائيلرز جو بار اهڙا ماڻهو برداشت ڪري رهيا آهن جيڪي ٽيڪس ادا ڪري رهيا آهن تنهن ڪري اهو ضروري آهي ته انهن کي ٽيڪس نيٽ ۾ آندو وڃي. هن چيو ته وزيراعظم پورٽس تي ڪسٽم اپريزنگ آفيسرن جو صوابديدي اختيار فوري طور تي ختم ڪرڻ ۽ اتي ڊيجيٽل نظام قائم ڪرڻ جي هدايت ڪئي آهي. ايندڙ 24 ڪلاڪن جي اندر ان حوالي سان قدم کڻي رپورٽ طلب ڪئي آهي. هن چيو ته حڪومتي قدمن جي ڪري گذريل ڪجهه ڏينهن دوران 3 لک کان وڌيڪ نوان ٽيڪس ڏيندڙن پنهنجا گوشوارا جمع ڪرايا آهن. هن چيو ته روينيو کي وڌائڻ تي وزيراعظم جو تمام گهڻو فوڪس رهيو آهي. گذريل ٻن هفتن دوران جعلي سيلز ٽيڪس ريفنڊ ڪندڙ چار هزار ماڻهن ۽ ڪمپنين جي نشاندهي ڪئي وئي آهي. انڊر انوائسنگ تمام وڏو ڏوهه آهي. وزيراعظم هدايت ڪئي آهي ته انڊر انوائسنگ ڪندڙ ڪمپنين جا ريفنڊ روڪيا وڃن. هن چيو ته ٽيڪس چوري ۾ ملوث ماڻهن سان گڏوگڏ آفيسرن ۽ اهلڪارن کي ڪرپشن ۽ بدعنواني جي چارجز تي او ايس ڊي بڻايو ويو. هن چيو ته ايف بي آر جا اهي آفيسر ڪسٽم سروس ۽ انڪم ٽيڪس IRIS سروس سان تعلق رکن ٿا. هن چيو ته ان کان اڳ به 21 ۽ 22 گريڊ جي آفيسرن کي او ايس ڊي بڻايو ويو هو. هن چيو ته انٽيلي جنس ۽ محڪماڻي رپورٽس تي اهو قدم کنيو ويو. هن چيو ته وزيراعظم سـٺي آفيسرن جي پذيرائي پڻ ڪئي، ڪجهه مهينا اڳ انهن کي ايوارڊ پڻ ڏنا ويا هئا. هن چيو ته بدعنوان ۽ ڪرپٽ عنصرن جي خلاف ايڪشن کنيو ويندو. وزيراعظم پهرين ڏينهن قوم کي خطاب ۾ چيو هو ته بدعنوان عنصرن جي خلاف ڪارروائي ڪئي ويندي. هن چيو ته حڪومت جي ڊيجيٽلائيزيشن سان گڏوگڏ بدعنوان عنصرن جي خلاف ڪارروائي تي ڀرپور ڌيان آهي. هن چيو ته ايندڙ ڏينهن ۾ ڊيجيٽلائيزيشن سان معيشت کي ڪيترائي سئو ارب رپين جو فائدو ٿيندو، هي اهي شيون آهن جن جو آءِ ايم ايف سان ڪو تعلق نه آهي. هن چيو ته ايف بي آر جو ادارو تيزي سان ڊيجيٽلائيزيشن طرف وڌي رهيو آهي. هن چيو ته رپئي جو مستحڪم ٿيڻ، پرڏيهي جي ذخيرن ۾ اضافو ٿيڻ، واپاري خساري جو گهٽ ٿيڻ، آءِ ٽي روانگي واپار جو وڌڻ اهي سموريون شيون مستحڪم معيشت طرف نشاندهي ڪن ٿيون. وفاقي وزير چيو ته بجيٽ جي حوالي سان جيڪي قدم کنيا ويا آهن جنهن ۾ گهٽ ۾ گهٽ اجرت کي وڌايو ويو آهي. هن چيو ته پگهاردار طبقي تي 35 سيڪڙو ٽيڪس جي ڳالهه ڪئي پئي وڃي جيڪا غلط فهمي تي ٻڌل آهي، اهو 35 سيڪڙو جو 10 سيڪڙو آهي جيڪو جڏهن ادا ڪيو وڃي ته 3 سيڪڙو ٿيندو، ان غلط فهمي تي سوشل ميڊيا تي وڏيون خبرون هلايون ويون ته پگهاردار طبقي تي 35 سيڪڙو ٽيڪس لڳايو ويو آهي جڏهن ته اهو 35 سيڪڙو ٽيڪس ته موجود هو ان 35 سيڪڙو تي 10 سيڪڙو سرچارج لڳو آهي جيڪو مجموعي طور تي 10 سيڪڙو نه آهي اهو ان 35 سيڪڙو جو 10 سيڪڙو آهي جيڪو اٽڪل 3 سيڪڙو بڻجي ٿو. هن چيو ته هڪ لک رپيا پگهاردار تي رڳو 1200 رپيا اضافي ٽيڪس لڳايو ويو آهي يعني جنهن جي هڪ لک رپيا پگهار آهي ان کي رڳو 2400 رپيا ٽيڪس ادا ڪرڻو پوندو. هن چيو ته نيوز پرنٽ تي ٽيڪس نه لڳڻ ڏنو ويو ته جيئن ميڊيا هائوسز ميڊيا ورڪرز کي وقت سر پگهارن جي ادائيگي کي يقيني بڻائين. ميڊيا ورڪرز ۽ صحافين جي لاءِ پي بي اي ۽ اي پي اين ايس پنهنجو ڪردار ادا ڪن. هن چيو ته پرڏيهي پاليسي انتهائي ڪاميابي سان اڳتي وڌي رهي آهي، اسان جي ٽيڪس جي نظام کي موثر بڻايو پيو وڃي ۽ ايف بي آر جي ڊيجيٽلائيزيشن تيزي سان اڳتي وڌي رهي آهي. هن چيو ته پي آءِ اي جي نجڪاري تي آگسٽ جي مهيني ۾ تيزي سان اڳڀرائي ٿيندي، ان کانسواءِ خرچ به گهٽ ڪيا پيا وڃن. هن چيو ته وزيراعظم ۽ حڪومت پهرين ڏينهن جن ترجيحن جو اعلان ڪيو هو انهن تي عملدرآمد ڏسڻ ۾ اچي رهيو آهي ۽ ان سان انشاءَ الله تمام گهڻي بهتري ايندي. صحافين جي سوالن جي جواب ۾ اطلاعات واري وفاقي وزير چيو ته ازبڪستان جي صدر سان ترمذ ۽ ڪراچي ويئر هائوسز قائم ڪرڻ تي تفصيلي ڳالهه ٻولهه ٿي، ڪراچي ۾ ازبڪ ڪاروباري ماڻهو فائدو کڻي سگهن ۽ اسان جا ڪاروباري ماڻهو ترمذ ۾ ويئر هائوس مان فائدو کڻي سگهندا. هن چيو ته وچ ايشيائي رياستون پاڪستان کي اهم ملڪ سمجهن ٿيون. هن چيو ته زراعت، مائننگ، پيٽرو ڪيميڪلز سميت ٻين شعبن ۾ حصيداري تي پڻ ڳالهه ٻولهه ٿي. ڪيترائي اهڙا ملڪ آهن جيڪي زرعي اوزار ۽ ٽريڪٽرز تيار ڪري رهيا آهن، ان ۾ به حصيداري ٿي رهي آهي. پاڪستان ۾ اڳ ۾ ئي ٽريڪٽرز تيار ٿي رهيا آهن، هن سال پاڪستان ۾ ٽريڪٽرز جو رڪارڊ وڪرو ٿيو، پاڪستان مان ٽريڪٽرز ۽ زرعي اوزار برآمد ڪري سگهجن ٿا، ان تي به سائيڊ لائين تي ڳالهه ٻولهه ۽ ڪم هلي رهيو آهي. آل پارٽيز ڪانفرنس جي حوالي سان سوال جي جواب ۾ اطلاعات واري وفاقي وزير چيو ته عزم استحڪام آپريشن تي آل پارٽيز ڪانفرنس گهرائڻ جي حوالي سان مشاورت جاري آهي. هن چيو ته آل پارٽيز ڪانفرنس بابت باني پي ٽي آءِ جو بيان به سامهون آيو آهي، الله ڪري هو ان تي قائم رهي، عزم استحڪام پوري ملڪ جو معاملو آهي، ان تي سمورين سياسي پارٽين کي آن بورڊ وٺڻ گهرجي. آل پارٽيز ڪانفرنس ۾ سمورين سياسي پارٽين جي شرڪت ٿيڻ گهرجي. هڪ سوال جي جواب ۾ اطلاعات واري وفاقي وزير چيو ته وزيراعظم واضح لفظن ۾ چيو ته اسان سمورن ملڪن سان سٺا لاڳاپا چاهيون ٿا، پاڪستان چاهي ٿو ته سمورن ملڪن جي حوالي سان سٺا لاڳاپا برقرار رهن، هن چيو ته روس سان بارٽر ٽريڊ تي پڻ ڳالهه ٻولهه ٿي آهي، ماضي ۾ به روس سان بارٽر ٽريڊ رهيو آهي. هن چيو ته ڪامياب پرڏيهي پاليسي جو مطلب اهو ئي آهي ته سمورن ملڪن سان سٺا لاڳاپا هجن. هڪ سوال جي جواب ۾ اطلاعات واري وفاقي وزير چيو ته باجوڙ ۾ اڳوڻي سينيٽر هدايت الله جي شهادت تي تمام گهڻو ڏک ۽ افسوس ٿيو آهي، وزيراعظم به ان واقعي تي گهري ڏک ۽ افسوس جو اظهار ڪيو آهي. هن چيو ته دهشتگردي ۽ انتهاپسندي ختم ٿيندي ته ملڪ ۾ مڪمل استحڪام ايندو. هن چيو ته دهشتگردن جو نه ڪو رنگ آهي نه نسل، اهي پاڪستان ۽ پاڪستان جي نظريي جي خلاف آهن. هن چيو ته عزم استحڪام هڪ ويزن جو نالو آهي، ان تي ٺوس حڪمت عملي جي ضرورت آهي. هڪ سوال جي جواب ۾ هن چيو ته توانائي واري وزير اويس لغاري نيپرا جي ٽيرف جي حوالي سان تفصيلي ڳالهه ٻولهه ڪئي آهي، توانائي وارو وفاقي وزير پنهنجو واضح موقف بيان ڪندو. هڪ سوال جي جواب ۾ هن چيو ته هڪ اعليٰ عهديدار جي ڌيءَ جي گاڏي سان حادثي جو شڪار ٿيل نوجوان جي پونئيرن کي انصاف ملڻ گهرجي، ان ڏس ۾ اسلام آباد پوليس غيرجانبداري جو مظاهرو ڪري، واقعي جي شفاف جاچ ٿيڻ گهرجي.

مضمون کا ماخذ : اٹلانٹس کا بادشاہ

متعلقہ مضامین